ناشط ثوري شهير يطلق شعاراً معاكساً في انتفاضة السويداء

كتب مروان حمزة

أصلا عبارة الشعب يريد اسقاط النظام عبارة غلط الشعب يريد النظام. لانو هذا مش نظام…
في نظام بالعالم يقال فيه رئيس الوزراء دون تفسير؟!
في نظام بالعالم يحق فيه لرئيس الوزراء فصل موظف من وظيفته مع حرمانه من التعويضات دون ابداء السبب؟!
او مصادرة الاملاك الخاصة للمعارضين بأوامر قضائية نزيهة؟

في نظام بالعالم بيطالع الموظفين لمسيرة تأييد تحت التهديد بالمحاسبة؟!
حتى الاشاعات يلي بتطلع عالمعارضين مابدها فطنة لمعرفة مصدرها الواحد وكيف وعمين بتتعمم للنشر..
في نظام بالعالم بيجوع شعبو وبيطالبو بالصمود.. والتصدي للمؤامرات التي تستهدف الكرامة الوطنية؟؟!!
عداك عن السيادة والخخخ!!..

في نظام بالعالم شبابو خدمو عسكرية الزامية 9 سنين؟ بدل مايبنوا مستقبلهن!!
في نظام بالعالم بيبصم فيه المعتقل على اعترافاتو وهو مطمش؟
السوريين كلهن حتى الموالين بيعرفوا كيف عم تندار أمور هالبلد!! لا هي قصة فساد وزارات ولا وزرا و لا مجلس شعب منتخب بالإرادة الحرة للناس..

امن جوي وسياسي وعسكري ودولة ومدري شو .. انو هذول عشو؟ ولشو؟ لحماية الوطن من المواطن يلي بيسب أو عندو رأي حر؟
في بلد بالعالم بيتحاكم فيه المعارضين بتهمة اضعاف الشعور القومي؟
في بلد بالعالم فيه المعارضة تحت السقف؟ وبيفصل معارضتو تفصيل!!.

في بلد بالعالم مابيرخص لحزب سياسي الا اذا ورد بنظامو الداخلي انو لا يسعى للوصول للسلطة يلي هيي اصلا بكل دول العالم سبب نشوء الخزب؟
و شو بدو يحكي الواح؟
….
في الحقيقة السوريين كل السوريين بدهم النظام
لانو هذا مش نظام..

مروان حمزة أحد الاصوات الوطنية الشريفة والنظيفة في السويداء تعرض مرات ومرات للاعتقال على ايدي كلاب الامن، لكن صوته مازال يصدح في وجه المجرمين والسفاحين والعصابة الاسدية القذرة التي مازالت تمارس كل انواع الارهاب بحق السوريين